Урматтуу замандаштар, кымбатуу кесиптештер!

Жакшы тилек — жарым ырыс! — деген кептин төркүнүндө көп нерсе жатат. Ошол эң ыйык тилектердин, алдыга коюлган асыл максаттардын башаты — дал ушул ата-бабаларыбыз байыртадан бери белгилеп келген Нооруз майрамы.

Ноорузда ар бир жан келечектен зор үмүт артат. Көкүрөгүнө аруу сезим уялатат.

Ыйык майрамда биз, жаңылануунун жолуна түшүп, түшүмүбүз мол, элибиз бакубат турмуш кечирсе экен деп тилек кылабыз.

Нооруз — жакшылыктын жарчысы!

Нооруз — ыйык тилектерге жык толгон майрам. Дал ушул күнү айлана ажайып кооздукка бөлөнөт. Көз жоосун алган көркөм табиятта өзгөрүү жүрөт. Көчөттөрдө бүчүр байлап, бак-дарактар жапжашыл түсүн жамынууга байыр алат. Саналуу күндөрдөн кийин ошол кооздуктан, ошол асем көрүнүштөн дилибиз тазарып, турмушубузда жандуу кыймыл башталат. Жазда жарышып, эгин эгип, үрөн сээп, келечекке зор үмүт байлайбыз.

Күн менен Түн теңелген жаратылыштын улуу мыйзамы алдында, алдыбызда бизди жакшылыктар гана күтүп турса экен, жергебизде тынчтык, элибизде молчулук болсо экен деп тилек кылам.

Ар намысты бийик туткан ак калпакчан агайын журтум, ак элечек апалар, болочок Кыргызстаныбыздын ээлери болгон жаштар!

Жамы кыргыз элим!

Сиздерди Улуу Нооруз майрамыңыздар менен чын пейлимден куттуктайм.

Ар бириңиздердин үйүңүздөрдө береке болсун!

Терең урматтоо менен Талас облустук сотунун төрагасы Алмазбек Абдылдаев